منصات التواصل الحديثة كانت غالبًا وسيلة لتسويق الجديد والغريب، تحتاج كاتب محتوى فنان، ومشهور محبوب، وأحيانا طبيب أو اثنين يقنعون المشاهد بأن منتجك ما فيه منه اثنين.. أو عالأقل ما بتلاقيه بسعر أفضل!
وإذا منتجك ممل؟
فيه منتجات هي نفسها من زمان، اسم معروف ومهمة ثابتة وما يبي لها فلسفة، زي الديتول، كلنا نحتاج ديتول كلنا نعرف متى وليش نشتريه، لكن أذا شركة ديتول تبي استراتيجية تسويق ترفع مبيعاتها ايش تسوي؟ بالذات انها ما عاد تقدر تبهرنا بكرت "يقضي على ٩٩.٩٪ من الجراثيم"
الكوميديا مفتاح الجيب
شركة Reckitt البريطانية، المالكة لعلامات تجارية مثل ديتول وفيت وديوركس راهنت على فكرة بديهية "محد ماله خلق يضحك" ممكن مالك خلق تسمع حقائق أو تقرأ مميزات، ولكن معقولة ما تبي تشوف علبة ديتول مهيصة مع أميرات ديزني؟ اقنعني أن ما عندك فضول تعرف نهاية القصة؟
وبعدين؟
إذا شفت المقطع للنهاية، وشفت الديتول وضحكت بنصير نحبه أكثر شوي لأننا بسيطين وندور الوناسة، وفي الصين المنصة البديلة لتيك توك هي (دوين) وداخلها أيضا متاجر للشراء، وبثوث مباشرة.. فيعني تضحك وتتذكر وش ناقصك مقاضي وتفتح الحساب اللي نشر المقطع وتلاقيه يبيع ديتول أو يحرج عليه ببث مباشر وتخلص أمورك سريع سريع وأنت مبسوط.
التسويق بدون غثى
٣٠٪ من مبيعات شركة Reckitt في الصين قبل كوفيد١٩ كانت عبر المواقع الإلكترونية، وبعد تحولها لنموذج التسويق بدون زن وإزعاج، نجحت برفع مبيعاتها الإلكترونية لتصل لـ ٨٠٪ في عام ٢٠٢٥ !
والسبب؟ الإخلاص
بدأت تجربة Reckitt من غرفة اجتماعات صغيرة، قبل أن تتحول إلى منشأة من خمسة طوابق قرب شنغهاي، تضم ١٨ استوديو لإنتاج المحتوى والبث المباشر. لم تكتفِ الشركة بالتعاون مع المؤثرين، بل وضعت موظفيها أمام الكاميرات بعد صعوبة العثور على صناع محتوى مناسبين. وأصبحت تنتج مشاهد كوميدية وعروضًا حية تصل إلى ١٢ ساعة يوميًا، تشرح فيها استخدامات المنتجات وتجيب عن أسئلة المشاهدين مباشرة. ففي أحد المقاطع، تحولت مشكلة الأحذية كريهة الرائحة إلى فرصة للترويج لديتول. والفكرة لا تنتهي عند الترفيه؛ إذ تراقب الشركة تفاعل الجمهور، وتتعرف على الأسئلة والاحتياجات المتكررة، ثم تعدّل محتواها ورسائلها التسويقية بسرعة.
بالأرقام :
- ١٥ مليار مشاهدة: حققتها المقاطع القصيرة التي أنتجتها الشركة خلال ٢٠٢٥، والبالغ عددها أكثر من مليون مقطع.
- ٤٠ مليون عميل جديد: اكتسبتهم الشركة في الصين خلال ٢٠٢٥، بدعم من استراتيجيتها الرقمية.
- ١٢ ربعًا متتاليًا: سجلت خلالها الشركة نموًا سنويًا من خانتين في مبيعات الصين، حتى الربع الثاني من ٢٠٢٦.
- ٨.٥٪ نموًا: سجلته مبيعات Reckitt في الأسواق الناشئة خلال النصف الأول من ٢٠٢٦، مقابل ٠.٨٪ في أمريكا الشمالية وانخفاض ٣٪ في أوروبا.
الصورة الكبرى
زمان كانت الأفضلية للمنتج الأقرب للعميل في السوبرماركت، لذا تكلفة الرفوف الأولى أعلى، لكن اليوم إذا ما طلع مقطعك اكسبلور قفل شركتك ومعوض خير.
