معرفة الرجال دخل إضافي 💰
التاريخ : 2026-02-08
مدة القراءة : 2 دقائق
كلنا نعرف ذاك الشخص اللي تلاقيه في كل استراحة ودايم يقول "عندي لك أحد"، أو اللي أول ما تذكر وظيفة، يقول لك "ترى ولد خالتي مسؤول توظيف هناك". طيب.. ليه ما يصير يدفعون له؟ 👀
هذا اللي قاله جو ماينداك، صاحب كتاب "Connectors Get Paid" (يعني دلّالين بس مودرن). ماينداك ما وقف عند التأليف، عمل منصة اسمها "Nolodex"، تحوّل المعارف والعلاقات الاجتماعية إلى فلوس، مو بس جهات اتصال في جوالك.
كيف تشتغل "Nolodex"؟
المنصة تدخلك دفتر العائلة، بس بفلوس. كل "مجتمع" له مالك يدفع اشتراك شهري (١٢٩ دولار)، ويحط له قوانين وعمولات: بعضها متاح بالدعوات فقط، والبعض مفتوح لخريجي جامعة معيّنة، أو بشروط ثانية.
الأعضاء يرشحون بعضهم لبعض، وإذا صارت "فزعة" وانتهت بصفقة، اللي دلّ يأخذ عمولة. ولو ما صار شيء.. يا دار ما دخلك شر.
الجميل أن كل ترشيح ينكتب ويتوثق، عشان مو أي أحد يقول "أنا اللي دلّيت".
مين المستفيد؟
- أصحاب الشبكات الكبيرة: أخيرًا صار في عائد مالي على كل "أعرف لك واحد".
- الشركات الصغيرة: تقدر تستفيد من قوة معارف الناس، بدون توظيف فريق مبيعات.
- اللي يستحون أو ما يعرفون أحد: يصير عندهم وصول لمعارف غيرهم.
لأن فيها تواصل إنساني واضح، نقدر نتوقع أن جودة التوصيات بتكون أعلى من غيرها. مؤسس المنصة يقول: "ما راح أرشح أحد إلا وأنا ضامن شغله، سمعتي على المحك".
الصورة الكبرى:
إذا كنت اللي دايم يسوي خير ويربط الناس ببعضها.. خذها أجر وأجرة، وفكر كيف توفق منهم رأسين بالأعمال.
اشترك معنا:
اقرأ المزيد من القصص والأخبار المماثلة يوميًا على بريدك.
قصص أُخْرى
