الفضول من الكلمات اللي تتكرر في كل نقاش عن الموظف في زمن الذكاء الاصطناعي. كيف إن البشر سيتفوقون دومًا لأن عندهم الذوق والحكم والتعاطف والخبرة الإنسانية. لكن هل احنا مستعدين لتكلفة هذا الفضول؟

فوائده مثبتة علميًا

تحليل لعدة دراسات علمية وجد إن الفضول الفكري يتنبأ بالنجاح الدراسي. و"ماتياس غروبر" من جامعة كارديف لقى إن الناس يتذكرون أكثر المعلومة اللي كانوا متشوقين لها، وحتى اللي التقطوها بالصدفة وهم في حالة فضول. 

الفضول يبيع ويوظف

أقوى سبب يخلي أحد يرقّي حسابه في "LinkedIn" هو معرفة مين يتفرج على ملفه. وحتى "Google" استخدمت حب الاستطلاع في التوظيف لمن علّقت مسألة رياضيات على لوحة إعلانية من غير ما تذكر اسمها، واللي حلّها وصل لموقع توظيف.

صفة لها عواقبها

ترا خبينا في أول فقرتين كلمة من أطول الكلمات العربية اللي حروفها تقرأ بالعكس. الفضول يشتت بطبيعته، وأنت الحين غالباً تدور عللى الكلمتين بدل ما تكمل القراءة.  نفس المشهد يصير في الشغل. الزميل الفضولي يشد خيط ورا خيط ويطلب بيانات أكثر ومعلومات أكثر، وممكن يلقى شي ثمين، وممكن بس يضيع وقت. الباحث سبنسر هاريسون من "INSEAD" سمّى هذا "الهدر المنتج"; تشتت قصير اليوم ممكن يفيدك بعد سنين.

الفضول يتطلب الحرية

دراسة "نيكولا شوت" و"جون مالوف" من جامعة نيو إنغلاند وجدت إن اللي يختارون الفيديو بأنفسهم يطلعون أكثر فضولاً بموضوعه من الفيديو المقترح من الخوارزميات. ولهذا السبب، شركة "Booking.com" تسمح لفرق المنتج تطلق اختباراتها بنفسها، ويجري عندها حوالي ١٠٠٠ اختبار بنفس الوقت. ألف سؤال مفتوح والشركة تكمل شغلها، وهذا قفزة صعبة على شركات كثيرة.

الصورة الكبرى

الشركة اللي توظف الفضوليين حالها أحسن من الشركة اللي تختار معدومي الشغف، لكن الاستفادة الكاملة، تعني قبول الثمن.. وقت يضيع في دروب مسدودة، وتجارب تجري بعيد عن عين الإدارة. لما تكتب "فضولي" في إعلان وظيفة، اكتب معاها كم ساعة في الأسبوع ميزانيتك مستعدة تخسرها عليه.