تتكلم مع لابتوبك كأنك تفضفض لصاحبك، ثم تتفاجأ إن نص المكتب يطالعون فيك. هذه مشكلة يعرفونها مستخدمي أدوات الإملاء الصوتي مثل "Wispr Flow"، وهي بالضبط اللي ناوين يحلونها شركة "Subvocal".
البداية من هاكثون
خلف "Subvocal" طالبين من جامعة "Georgia Tech". بدايتهم من دون أي خبرة في المجال، لكن في هاكاثون "TreeHacks" بستانفورد حاولوا يقلدون نظام "AlterEgo" من "MIT" في ٣٦ ساعة بأقطاب كهربائية على الوجه، وما ضبطت معهم.. فقرروا يتجهون لموجات الراديو.
وش الفكرة؟
النظارة ترسل موجات راديو للوجه، وبناءً على حركة عضلات عند الكلام، تتغير الطريقة اللي ترجع فيها الإشارة للنظارة. الشركة عملت نموذج ذكاء اصطناعي يحول هذه التغيرات إلى نص. النظارة بدون كاميرا، يعني اللي حولك ما راح يشتكون من اختراق خصوصيتهم. بس ممكن يشكّون بفقدان عقلك، لأنك لازم تتكلم بجد، لكن من غير صوت.
٢٠٠ كلمة بالدقيقة
تقول الشركة إنها تفك الكلام بسرعة ٢٠٠ كلمة بالدقيقة، بينما الشخص العادي يكتب بسرعة ٤٠ إلى ٥٠ كلمة بالدقيقة. وممكن شخصين يلبسون النظارة ويتكلمون عبر قاعة مزدحمة بدون ما يسمعهم أحد. يعني اجتماع كامل بدون صوت، والمحضر يكتب نفسه. هذي كلها ادعاءات ما تحقق منها طرف مستقل لأنهم باقي ما اطلقوا النظارة، وما نشروا نسبة الدقة ولا عمر البطارية. ورغم التساؤولات حول التعامل مع اللهجات، والكلمات غير المألوفة، والإملاء الطويل، في ناس بدأت تطلبها مسبقًا بقيمة ٤٩٩ دولار (حوالي ١٨٧٠ ريال).
الصورة الكبرى
المنتج يبيع الخصوصية في الأماكن العامة، بس يبغاك تعطي بيانات كلامك وحتى همساتك لشركة ربحية. هذه المفارقة ستحدد مصير النظارة أكثر من سرعة الكتابة. بعض العملاء يطالبون بمعالجة محلية على الجهاز، وإلا سيلغون طلباتهم. يا ترى كيف سيكون دعم اللغة العربية؟ حروف مثل الضاد والعين والقاف تحرك اللسان والحلق بطريقة مختلفة عن الإنجليزية؛ ممكن نكون آخر ناس تكتب بالشفاه. ننتظر ونشوف.
